Toyblæuorðabókin

Tað er ikki altíð til at vita, hvat ein garvað toyblæumamma meinar, tá hon brúkar serstøk hugtøk og vendingar, sum Palleba ikki hevur hoyrt fyrr. Ja, tað er sanniliga ein vavgreytur av tøkniorðum og heimabryggjaðum vendingum, hvørt um annað, tá ein traðkar inn í toyblæufrumskógin. Her royni eg at greiða fløkjurnar, so øll kunnu vera við í toyblæutosinum! 

  • AIO - All-In-One
    All-in-One blæurnar eru helst lættasta toyblæuloysnin, tí alt er seymað fast í einum. Vansin við teimum er tó, at tær ofta eru longri um at torna, tá deilirnir ikki kunnu skiljast sundur.
  • AI2 - All-In-Two
    All-In-Two blæur eru, sum navnið leggur upp til, í tveimum pørtum: Ein vatntøtt skel og eitt innlegg, sum passar til, og sum er súgvandi parturin. Tá blæan skal skiftast, verður innleggið tikið úr og nýtt kann koyrast í skelina, sum kann nýtast 5-7 ferð ella inntil hon verður skitin.
  • Bulky
    Enskt heiti fyri blæu, sum fyllir nógv.
  • Boingo
    Verður nýtt at festa eina gamaldags toyblæu ella prefold um barnið í staðin fyri trygdarnálirnar, sum mann nýtti fyrr.
  • Boostari / at boosta
    Ein boostari er eitt eyka innlegg, sum kann leggjast í blæuna, so hon fær hildið uppá meira vesku. At boosta merkir sostætt at økja um súgvimegina.
  • BTP
    Stytting fyri Birth To Potty
  • Cover
    Enskt orð fyri skel.
  • Doubler
    Enskt heiti fyri boostari.
  • EC - Elimination Communication
    Elimination Communication er eitt slag av pottatrening, sum 100% er eftir barnsins treytum, og sum ein kann byrja við so skjótt, barnið er føtt.
  • Fitted (formseymað)
    Ein toyblæa, sum er seymað við sama sniði, sum einnýtisblæa. Verður nýtt við vatntættari skel útyvir.
  • Fit
    Ensk heiti fyri snið.
  • Flat
    Enskt heiti fyri gamaldags toyblæu.
  • Fleece
    Fleeceinnlegg kunnu nýtast at leggja ovast í blæuni, so barnið kennir seg turt, tí fleece leiðir skjótt vætuna víðari í súgvandi løgini. Fleeceinnlegg kunnu eisini nýtast at fanga skarn við.
  • Fluff
    Ensk slang fyri toyblæu.
  • Fluff mail
    Enskt slang fyri at fáa toyblæupost.
  • Gussets
    Enskt heiti fyri lekaverju.
  • Hook and loop
    Enskt hugtak fyri karðalás.
  • Lanolin/lanolinviðgera
    Feittstoff í ull, sum kann nýtast at gera ull vatnavvísandi. At lanolinviðgera merkir sostatt at viðgera ullina við lanolin.
  • Lummablæa
    Lummablæur hava eitt vatntætt lag uttan og ein lumma innan, sum innlegg kunnu koyrast í. Lummablæan kann sostatt boostast til tørvin á einstaka barninum. Hetta merkir eisini, at turkitíðin ikki er so long, eftirsum innleggini eru leys frá sjálvari blæuni. Tó er ein vansi, at í summum blæum, mugu innleggini takast úr við hond áðrenn vask, tí tey verða ikki slongd úr í maskinuni. Innlegg fylgja altíð við lummablæum.
  • Longies
    Ullblæubuksur við langum beinum
  • Lækagebarrierer
    Danskt heiti fyri lekaverja.
  • Mikrotrevjar (mikrofibur)
    Mikrotrevjar eru ruflutir á yvirflatuni og kennast tískil ikki góðir móti húðini. Tí skulu mikrotrevjainnlegg altíð í ein lumma ella dekkast væl við onkrum, sum er gott móti húðini, til dømis fleece. Mikrotrevjar súgva øgiliga skjótt, men fær ikki so væl hildið uppá nógvari vesku í sær sjálvum. Tí er gott at nýta innlegg úr bambus, bummull ella hamp, sum súgva væl, undir.
  • Minky
    Minky er ein loðin úgáva av mikrotrevjum. Navnið kemur av, at tað er mjúkt, sum ein minkur.
  • Nappi nippa
    Eisini nevnt SnappiEin máti at festa eina gamaldags toyblæu ella prefold um barnið í staðin fyri trygdarnálirnar, sum mann nýtti fyrr.
  • OS
    Stytting fyri one-size
  • OSFA
    Stytting fyri one-size, fits all
  • Pail liner
    Ein stórur vatntættur vaskiposi, sum kann nýtast í einari blæu- ella ruskspann til skitnar blæur. Tá blæurnar skulu vaskast, verður allur posin sum hann er koyrdur í maskinuna.
  • Pappírsinnlegg
    Eitt tunt einnýtisinnlegg, sum verður lagt ovast í blæuna at fanga skarn.
  • Prefold
    Eitt fýrakantað, súgvandi toystykki, sum er seymað soleiðis, at tað hevur eyka nógv løg í miðjuni. Ein prefold kann leggjast saman og nýtast sum boostari - ella sum toyblæa í sær sjálvum, sum verður hildin saman við einum Snappi og einari skel uttaná.
  • PUL
    PUL (Polyutherane Laminate) er ein tunn, vatntætt hinna, sum higartil er umhvørvisvinarligasti kemiski hátturin at gera toy vatntætt. Vanliga verður PUL smeltað á toy, so tað verður vatntætt á aðrari síðuni og bleytt á hinari.
  • Skel
    Skelin er tað vatntætta lagið uttaná teimum súgvandi løgunum og kann vera gjørd av PUL/TPU, ull ella fleece. Í summum blæum er hetta lagið ein fastur partur av blæuni (til dømis AIO og lummablæur), við SIO verður súgvandi innleggið knappað í skelina, og við formseymaðum skal skelin koyrast útyvir.
  • Shorties
    Ullblæubuksur við stuttum beinum
  • Sized
    Blæa í ávísari stødd (til dømis S, M, L ella 1, 2, 3 - hetta er ymiskt frá merki til merki).
  • Snap-In-One (SIO)
    Snap-In-One blæur eru í tveimum pørtum: Ein skel og eitt súgvandi innlegg. Hetta merkir styttri turkitíð. Innleggini kunnu knappast í skelina, sum ger tær lættar at brúka. Skelin kann nýtast 3-5 ferðir, áðrenn hon skal vaskast.
  • Snaps
    Enskt orð fyri trýstknappar.
  • Soaker
    Enskt orð fyri blæubuksur úr annaðhvørt ull ella fleece.
  • Stash
    Enskt orð fyri toyblæusavn.
  • Stay-dry
    Hevur blæan stay-dry effect, merkir tað, at hon hevur fleece innast, sum ger, at húðin verður hildin turr hóast barnið hevur pissað. Stay-dry innlegg fáast eisini fyri seg og kunnu leggjast í einhvørja blæu.
  • Stripping / at strippa blæur
    At reinsa sápurestir, krem o.s.fr., sum hevur savnað seg gjøgnum tíðina, úr toyblæum. Les hvussu tú gert her.
  • Snappi
    Eisini nevnt nappi nippa. Verður nýtt at festa eina gamaldags toyblæu ella prefold um barnið í staðin fyri trygdarnálirnar, sum mann nýtti fyrr.
  • TPU
    Munurin á PUL og TPU (Thermoplastic polyurethane) er framleiðsluhátturin. TPU verður hitaviðgjørt fyri at laminera toyið, so tað verður vatnavvísandi.
  • Training pants
    Eitt slag av vatntættum undirbuksum. Eru góðar at nýta, tá barnið venur seg av við blæuna.
  • Trim
    Enskt heiti fyri blæu, sum fyllur lítið.
  • Ullblæubuksur
    Skel úr ull.
  • Velcro
    Enskt fyri karðalás.
  • Vátposi
    Vatntættur posi til skitnar blæur. Fæst í ymsum støddum og sniðum.
  • Wetbag
    Enskt orð fyri vátposi.
  • Wrap
    Enskt orð fyri formseymaða skel.